Sir 25
1ⲁⲓⲥⲁⲁⲧϣⲟⲙⲛⲧ ⲛϩⲱⲃ ⲁⲩⲱ ⲁⲓⲧⲱⲱⲛ ⲉⲛⲉⲥⲱⲓ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲛ ⲛⲣⲱⲙⲉ ϩⲛ ϩⲉⲛⲥⲛⲏⲩ ⲉⲩⲟ ⲛⲟⲩϩⲏⲧ ⲛⲟⲩⲟⲧ ⲁⲩⲱ ⲟⲩϣⲃⲏⲣ ⲙⲛ ⲡⲉⲧϩⲓⲧⲟⲩⲱϥ ⲁⲩⲱ ⲟⲩⲣⲱⲙⲉ ⲙⲛ ⲧⲉϥⲥϩⲓⲙⲉ ⲉⲩϥⲓ ϩⲁ ⲛⲉⲩⲉⲣⲏⲩ 2ϣⲟⲙⲛⲧ ⲛϩⲱⲃ ⲛⲉⲛⲧⲁⲧⲁⲯⲩⲭⲏ ⲙⲉⲥⲧⲱⲟⲩ ⲁⲩⲱ ⲁⲓⲙⲉⲥⲧⲉⲛⲉⲩϩⲃⲏⲩⲉ ⲉⲙⲁⲧⲉ ⲟⲩϩⲏⲕⲉ ⲛϫⲁⲥⲓϩⲏⲧ ⲙⲛ ⲟⲩⲣⲙⲙⲁⲟ ⲛⲣⲉϥϫⲓϭⲟⲗ ⲙⲛ ⲟⲩϩⲗⲗⲟ ⲛⲛⲟⲉⲓⲕ ⲛⲁⲑⲏⲧ 3ⲉⲙⲡϥⲥⲱⲟⲩϩ ⲉϩⲟⲩⲛ ϩⲛ ⲧⲉϥⲙⲛⲧⲕⲟⲩⲓ ⲉϥⲛⲁϭⲓⲛⲉ ⲧⲱⲛ ϩⲛ ⲧⲉϥⲙⲛⲧϩⲗⲗⲟ 4ⲉϣϫⲉ ⲛⲉⲥⲉⲫⲁⲡ ⲛⲛⲣⲙⲛⲥⲕⲓⲙ ⲁⲩⲱ ⲛϩⲗⲗⲟ ⲉⲧⲣⲉⲩⲉⲓⲙⲉ ⲉϣⲟϫⲛⲉ 5ⲉϣϫⲉ ⲛⲉⲥⲉⲧⲥⲟⲫⲓⲁ ⲛⲛϩⲗⲗⲟ ⲁⲩⲱ ⲡⲙⲉⲉⲩⲉ ⲙⲛ ⲡϣⲟϫⲛⲉ ⲛⲛⲉⲧⲧⲁⲓⲏⲩ 6ⲡϫⲛⲧϩⲁϩ ⲡⲉ ⲡⲉⲕⲗⲟⲙ ⲛⲛϩⲗⲗⲟ ⲁⲩⲱ ⲡⲉⲩϣⲟⲩϣⲟⲩ ⲡⲉ ⲑⲟⲧⲉ ⲙⲡϫⲟⲓⲥ 7ⲁⲓⲙⲁⲕⲁⲣⲓⲍⲉ ⲙⲯⲓⲧ ⲛϩⲱⲃ ϩⲙ ⲡⲁϩⲏⲧ ⲁⲩⲱ ϯⲛⲁϫⲉⲡⲙⲉϩⲙⲏⲧ ϩⲙ ⲡⲁⲗⲁⲥ ⲟⲩⲣⲱⲙⲉ ⲉϥⲉⲩⲫⲣⲁⲛⲉ ⲉϫⲛ ⲛⲉϥϣⲏⲣⲉ ⲉϥⲟⲛϩ ⲉϥϭⲱϣⲧ ⲉⲡϩⲉ ⲛⲛⲉϥϫⲁϫⲉ 8[ⲛⲁⲓⲁⲧϥ ⲙ]ⲡⲉⲧϣⲟⲟⲡ ⲙⲛ ⲟⲩⲥϩⲓⲙⲉ ⲛⲥⲁⲃⲉ ⲁⲩⲱ ⲡⲉⲧⲉⲙⲡϥⲥⲗⲁⲁⲧⲉ ϩⲙ ⲡⲉϥⲗⲁⲥ ⲙⲛ ⲡⲉⲧⲉⲙⲡϥⲣϩⲙϩⲁⲗ ⲙⲡⲉⲧⲥⲏϣ ⲉⲣⲟϥ 9ⲛⲁⲓⲁⲧϥ ⲙⲡⲉⲛⲧⲁϥϩⲉ ⲉⲧⲙⲛⲧⲥⲁⲃⲉ ⲁⲩⲱ [ⲡ]ⲉⲧϣⲁϫⲉ ⲉⲩⲙⲁⲁϫⲉ ⲙⲡⲉⲧⲥⲱⲧⲙ 10[ⲉϣ]ϫⲉ ⲟⲩⲛⲟϭ ⲡⲉ ⲡⲉⲛⲧⲁϥϩⲉ ⲉⲧⲥⲟⲫⲓⲁ [ⲁⲗ]ⲗⲁ ⲙⲛⲡⲉⲧⲟ ⲛⲛⲟϭ ⲉⲡⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ 11[ⲑⲟⲧⲉ ⲙ]ⲡϫⲟⲉⲓⲥ ⲥⲟⲧⲡ ⲉⲣⲟⲟⲩ ⲧⲏⲣⲟⲩ ⲉⲣⲉⲡⲉⲧⲁⲙⲁϩⲧⲉ ⲙⲙⲟⲥ ⲧⲛⲧⲱⲛ ⲉⲛⲓⲙ 12 13ⲛⲁⲛⲟⲩⲡⲗⲏⲅⲏ ⲛⲓⲙ ⲉⲡⲗⲏⲅⲏ ⲛϩⲏⲧ ⲛⲁⲛⲟⲩⲡⲟⲛⲏⲣⲓⲁ ⲛⲓⲙ ⲉⲡⲟⲛⲏⲣⲓⲁ ⲛⲥϩⲓⲙⲉ 14ⲛⲁⲛⲟⲩⲙⲟⲭⲥ ⲛⲓⲙ ⲉϩⲟⲩⲉ ⲙⲟⲕϩⲥ ⲛⲛⲉⲧⲙⲟⲥⲧⲉ ⲛⲁⲛⲟⲩϫⲓⲕⲃⲁ ⲛⲓⲙ ⲉϩⲟⲩⲟ ⲉϫⲓⲕⲃⲁ ⲛϫⲁϫⲉ 15ⲙⲛⲁⲡⲉ ϩⲟⲟⲩ ⲉⲧⲁⲡⲉ ⲙⲫⲟϥ ⲁⲩⲱ ⲙⲛϭⲱⲛⲧ ⲉⲡⲁⲡϫⲁϫⲉ 16ϯⲛⲁⲟⲩⲉϣⲟⲩⲱϩ ⲙⲛ ⲟⲩⲙⲟⲩⲓ ⲙⲛ ⲟⲩⲇⲣⲁⲕⲱⲛ ⲉϩⲟⲩⲟ ⲉⲟⲩⲱϩ ⲙⲛ ⲟⲩⲥϩⲓⲙⲉ ⲉⲥϩⲟⲟⲩ ⲁⲩⲱ ⲣⲣⲉϥϭⲱⲛⲧ 17ϣⲁⲣⲉⲧⲡⲟⲛⲏⲣⲓⲁ ⲛⲟⲩⲥϩⲓⲙⲉ ⲉⲥϩⲟⲟⲩ ϣⲓⲃⲉ ⲙⲡⲉⲥϩⲟ ⲁⲩⲱ ϣⲁⲥⲣⲡⲉⲥϩⲟ ⲛⲕⲁⲕⲉ ⲛⲑⲉ ⲛⲟⲩϭⲟⲟⲩⲛⲉ 18ⲉⲣϣⲁⲛⲡⲉⲥϩⲁⲓ ⲛⲟϫϥ ϩⲛ ⲧⲙⲏⲧⲉ ⲙⲡⲉⲧϩⲓⲧⲟⲩⲱϥ ⲛϥⲥⲱⲧⲙ ϣⲁϥⲁϣⲁϩⲟⲙ ⲉϥⲥⲁϣⲉ 19ⲕⲁⲕⲓⲁ ⲛⲓⲙ ⲥⲟⲃⲕ ⲛⲛⲁϩⲣⲛ ⲧⲕⲁⲕⲓⲁ ⲛⲧⲉⲥϩⲓⲙⲉ ⲉⲣⲉⲡⲉⲕⲗⲏⲣⲟⲥ ⲛⲟⲩⲣⲉϥⲣⲛⲟⲃⲉ ϩⲉ ⲉⲧⲟⲟⲧⲥ 20ⲛⲑⲉ ⲛⲟⲩ[ϩⲗ]ⲗⲟ ⲉϥⲱⲗ ⲉϩⲣⲁⲓ ϩⲛ ⲟⲩⲥⲕⲁⲣⲁⲕⲓⲣ ⲛϣⲱ ⲧⲁⲓ ⲧⲉ ⲑ[ⲉ ⲛ]ⲟⲩⲥϩⲓⲙⲉ ⲛⲣⲉϥⲁϣⲕⲁⲕ ⲉⲃⲟⲗ ⲛⲛⲁϩⲣⲛ ⲟⲩϩⲁⲓ ⲛⲣⲙⲣⲁϣ 21ⲙⲡⲣϩⲉ ⲉⲧⲟⲟⲧⲥ ⲛⲟⲩⲥϩⲓⲙⲉ ⲉⲛⲉⲥⲱⲥ ⲁⲩⲱ ⲙⲡⲣⲙⲉⲣⲉⲥϩⲓⲙⲉ 22ⲟⲩⲟⲣⲅⲏ ⲙⲛ ⲟⲩⲙⲛⲧⲁⲧⲃⲁⲗ ⲙⲛ ⲟⲩϣⲓⲡⲉ ⲡⲉ ⲟⲩⲥϩⲓⲙⲉ ⲉⲥϯ ⲉⲧⲟⲟⲧϥ ⲙⲡⲉⲥϩⲁⲓ 23ⲟⲩϩⲏⲧ ⲉϥⲑⲃⲓⲏⲩ ⲙⲛ ⲟⲩϩⲟ ⲉϥⲟⲕⲙ ⲙⲛ ⲟⲩⲡⲗⲏⲅⲏ ⲛϩⲏⲧ ⲡⲉ ⲟⲩⲥϩⲓⲙⲉ ⲉⲥϩⲟⲟⲩ ϩⲛϭⲓϫ ⲉⲩⲕⲏ ⲙⲛ ϩⲛⲡⲁⲧ ⲉⲩⲃⲏⲗ ⲉⲃⲟⲗ ⲡⲉ ⲟⲩⲥϩⲓⲙⲉ ⲉⲛⲥⲙⲁⲕⲁⲣⲓⲍⲉ ⲁⲛ ⲙⲡⲉⲥϩⲁⲓ 24ⲛⲧⲁⲧⲁⲣⲭⲏ ⲙⲡⲛⲟⲃⲉ ⲉⲓ ⲉⲃⲟⲗ ϩⲛ ⲧⲉⲥϩⲓⲙⲉ ⲁⲩⲱ ⲉⲧⲃⲏⲧⲥ ⲉⲛⲁⲙⲟⲩ ⲧⲏⲣⲛ 25ⲙⲡⲣϯⲧⲉϩⲓⲏ ⲛⲟⲩⲙⲟⲟⲩ ⲉϥⲥⲱⲕ ⲙⲡⲣϯⲡⲁⲣϩⲏⲥⲓⲁ ⲛⲟⲩⲥϩⲓⲙⲉ ⲉⲥϩⲟⲟⲩ 26ⲉϣⲱⲡⲉ ⲉⲛⲥⲛⲁⲟⲩⲁϩⲥ ⲛⲥⲱⲕ ⲁⲛ ⲥⲟⲗⲡⲥ ⲉⲃⲟⲗ ⲛⲛⲉⲕⲥⲁⲣⲝ
Copyright information for
CopSahBible2